OK LANG LANGAW BASTA MAY PANGINABUHING IKALINGAW

Sulat ni: Conrad Soria

       Kini mao ang hiniusang pahayag sa daghang mga tawo ug pipila ka opisyales sa Barangay isip tubag sa daghang reklamo sa pagdagsang sa daghang langaw dinhi sa Gingoog. Matod pa sa mga pamahayag dili maayo sa kahimsog sa katawhan ang pagdagsang sa daghang langaw. Apan gumikan kay kining mga langaw gikan man sa daghang namuhi ug mga manok nga nagsilbi nilang pangita daghan usab ang mikonsiderar niini ug nag-ingon nga anaa na sa usag-usa ang diskarte unsaon pag-abog ang mga langaw.

        Ang pagdagsang sa langaw dinhi sa dakbayan sa Gingoog gipasangil sa pagkuyanap sa daghang namuhi ug manok nga giingong tabang sa usa ka pulitiko. Ngani gihimo kining isyo sa eleksiyon batok sa maong pulitiko gikan sa iyang mga kaatbang. Bisan pa niini nakadaug ang maong pulitiko ug naka-angkon ug pwesto sa gobyerno. Taliwala niining tanan nagdasig gihapon ang mga nagbantay sa maayong panglawas nga ampingan gihapon ang kalinis sa palibot sa mga balay sa mga Gingoognon aron makalikay sa possible nga dautang epekto niining mga langaw.