Sulat ni Conrad Soria
5 ngadto sa 8 ka gatos ka milyon ka pesos (500 to 800 Million) ang banabana nga magasto kon tukoron pagbalik ang merkado sa Agora dinhi sa dakbayan sa Gingoog. Mao kini ang nahipos nga kasayuran sa Monitor Today gikan sa mga kasaligang tinubdan sa market administ ration ning dakbayan . Sumala pa ni Teddy Caballes mahimo lamang kini sa syudad sa hinayhinay kon ‘progressive type’ tungod kay apiki man ang panalapi. Si kanhi Mayor Miguel Paderanga kinsa maoy nakapatukod sa nasunog nga Agora miingon nga sa iyang panahon migasto lamang ang syudad sa kapin kon kulang 19 milyones ka pesos.
Sa samang kalambuan gipahayag ni Dodong Jinayon nga ilang gipaningkamotan nga mapahiluna gayod ang temporaryong kabalhinan sa mga apektadong mamaligyaay sa merkado nga nabiktima sa hingpit pagkasunog niini niadtong Agosto 7 ning tuiga. Wala usab siya mokomentaryo kon pilay hinabang pinanansyal nga ihatag sa syudad ngadto sa mga biktima sa sunog sa merkado kon aduna man ugaling. Tubag kini ni Jinayon sa espekulasyon sa mga mamaligyaay nga hatagan sila sa syudad ug hinabang nga balig 5 ka libo ka pesos, kapin kon kulang.
No comments:
Post a Comment