HUMAN SA SUNOG GUBOT ANG MERKADO

Sulat ni Conrad Soria 

     Gubot ang hitsura sa merkado publiko sa dakbayan sa Gingoog human kini masunog niadtong Sabado, Agosto 7 ning tuiga. Kini ang obserbasyon sa daghang mga Gingoognon nga nakamtikod sa pagpanubo daw uhong sa mga balaybalay sa kaniadto mga dalan libot sa merkado aron temporaryong butangan sa mga baligya niadtong mga nasunogan. Sumala pa ni Dodong Jinayon, usa sa mga tinugyanan sa Market Administration, ang ilang buhatan karon maoy gitahasan sa kagamhanang local nga mopahiluna sa mga nasunogan samtang wala pa matul-id ang Agora.

     Kasamtangan nga gibutang karon ang isdaan ug karnehan duol sa baligyaanan ug mga bulak samtang ang ubang mga baligya temporaryo usab nga gibutang duol ug kilid sa Bagsakan. Tungod ning maong sitwasyon namatikdan nga mipi-ot ug dyutay ang mga agianan libot sa merkado publiko.