44 SENTABOS NGA USBAW SA MORESCO DOS

Sulat ni: Conrad Soria

      Ipatuman na sa Moresco dos ang 44 sentabos nga usbaw sa balayranan matag kilowatt nga nagamit sa mga konsumidor. Kini human uyoni sa mga miyembro-konsumidor atol sa ika-31 nga Annual General Assembly Meeting niadtong Sabado, Agosto 21, 2010 sa Arturo S. Lugod Gymnasium ning dakbayan. Ang usbaw gamiton alang sa pagbutang ug duha ka mga sub station sa Claveria ug Magsaysay, Misamis Oriental. Si General Manager Amado Kee miingon, ang mga miyembro wala mouyon sa gisugyot sa hunta direktiba nga 65 sentabos nga usbaw tungod kay bug-at alang kanila ang diretso nga pagpatuman niini.

      Matod ni Kee ang 65 sentabos mao unta ang ibayad sa balig 320 milyones pesos nga hulamon sa Moresco gikan sa National Electrification Administration kon NEA aron gamiton sa dose ka mga proyekto sa kooperatiba. Apan mibarog si Mayor Jojo Pupos sa Medina aron paghangyo nga dili gulpihon ang mga proyekto ug i-prioridad lamang ang Claveria ug Magsaysay. Miuyon ang mga miyembbro sa maong sugyot ug giamendar ang 65 sentabos ngadto na sa 44 sentabos kapin kon kulang tungod kay ang hulamon sa Moresco dos mao lamang una ang balig 204 milyones pesos alang sa nahisgutang duha ka dagkong proyekto.