HUMAN sa pagkaugdaw sa merkado sa siyudad sa Gingoog sa nilabayng adlaw hugot ang gihimong panawagan sa Bureau of Fire Protection ning siyudad sa Cagayan de Oro sa mga nanag-iya sa stall sa kamerkaduhan ning siyudad.
Gipaabot ngadto sa mga stall vendors ni SFO1 Charles Neri sa BFP atol sa pakighinabi sa Sun.Star SuperBalita nga unta magbinantayon ang mga mamaligyaay sa merkado aron dili masinati ang nahitabo nga pagkasunog sa merkado sa Gingoog niadtong Sabado sa kadlawon nga miluntad pa og pipila ka oras usa napalong.
Gipanawagan niini sa mga nanag-iya og tindahan sulod sa merkado nga sa dili pa mobiya sa stall sigurohon nga palong ug giibot tanan kuryente. Dili magbilin og suga nga nagsiga tungod kay ang sayop sa usa mahimong maangin sa tanan labina kung moulbo ang sunog.
Gani ang BFP kanunay nga nihimo og mga training ug seminars sa mga barangay ning siyudad apil na ngadto sa mga tunghaan unsay angay nga buhaton aron malikayan ang pag-ulbo sa sunog.
"Wala ta nagkulang sa pagpahibalo sa katawhan unsaon aron malikayan ang sunog ug hinaot nga magbinantayon gyod matag-adlaw," ni Neri.
Giingong ang nahitabo sa siyudad sa Gingoog mahimong mahitabo bisan asa. Apan kung magtinabangay ug magbinantayon ang matag-usa dili mahitabo ang susama niini.
Kahinumduman nga nagbilin og P36 milyon nga danyos ang nahitabong sunog sa merkado sa dakbayan sa Gingoog. Daghan sa mga tindahan ang nawad-an og mga panginabuhian human napaig og naabo ang ilang mga baligya.
Subay sa report sa Bureau of Fire Department sa maong siyudad, gituohang faulty electrical wirings ang hinugdan human alas 12:45 pa sa kadlawon namatikdan ang pag-ulbo niini nga natapos sa alas 7:00 sa buntag. Hinuon walay naangol o namatay sa maong sunog.
Padayon pa ang imbestigasyon sa BFP human mitumaw ang taho nga giingong gituyo pagsunog ang merkado. (SVB)
No comments:
Post a Comment